શીર્ષક - કેવું હશે ? ✍️ મિલન અંટાળા (સુરત)

શીર્ષક - કેવું હશે ? 

પહેલાં લાગ્યું સ્વપ્ન હશે, 
પછી લાગ્યું કે સાચું થશે, 
નથી હવે કોઈ શંકા કશે, 
અત્યારે તો એક જ સવાલ, બચ્ચું અમારું કેવું હશે?

હું કહું છું છોકરી હશે,
તું કહે છે છોકરો થશે,
જે હોય તે રમાડવા થશે,
અત્યારે તો એક જ સવાલ, બચ્ચું અમારું કેવું હશે?

જનમતા જ બધાં હરખાઈ જશે,
ખુશીનો દરિયો તો છલકાઈ જશે,
વહાલનાં આશીર્વાદોનો વરસાદ હશે, 
અત્યારે તો એક જ સવાલ, બચ્ચું અમારું કેવું હશે?

ઘોડિયામાં ઝુમ્મર બંધાશે, 
એમાં મોર-પોપટ લટકાશે, 
એ ટગર ટગર જોયા કરશે, 
અત્યારે તો એક જ સવાલ, બચ્ચું અમારું કેવું હશે?

એની ચીસોનો રણકાર થશે,
ઝભલાં-ટોપીનાં ઢગલાં થશે,
રમકડાંઓ બધાં નવાં હશે, 
અત્યારે તો એક જ સવાલ, બચ્ચું અમારું કેવું હશે?

પિતા મારા દાદા બનશે, 
મા મારી દાદી કહેવાશે, 
બધાં એને વહાલ કરશે, 
અત્યારે તો એક જ સવાલ, બચ્ચું અમારું કેવું હશે?

છઠ્ઠી કરાશે છઠ્ઠા દિવસે, 
એની મા એને જ રમાડશે, 
નામકરણ એનું ફઈ કરશે,
અત્યારે તો એક જ સવાલ, બચ્ચું અમારું કેવું હશે?

ઝરણાંની મમતા વહેતી હશે,
મિલનની મસ્તી બમણી થશે, 
દાદી શિવાજીનું હાલરડું ગાશે, 
અત્યારે તો એક જ સવાલ, બચ્ચું અમારું કેવું હશે?

પહેલા લાગતું સ્વપ્ન હશે, 
ટૂંક જ સમયમાં સાચું થશે, 
આતુરતાનો અંત આવશે, 
અત્યારે તો એક જ સવાલ, બચ્ચું અમારું કેવું હશે?

✍ મિલન અંટાળા (સુરત)