🌹અચાનક 🌹 ✍️ હર્ષદ રાવલ , વલ્લભવિદ્યાનગર

   રસ્તે જતાં એનું મળી જવું, સાવ અચાનક;
   હા, આ એ જ,મનનું કળી જવું, સાવ અચાનક !

   દૂરથી જોઇને જ મોં ફેરવી લીધું આજ;
   મૃગ, મૃગજળને છળી ગયું, સાવ અચાનક!

   થઇ રહ્યું છે આમ તો બધું ધારણાં મુજબનું;
   પણ થઇ રહ્યું છે તોય બધું, સાવ અચાનક !

   કલિનાં પગરણ થઇ ચૂક્યા છે; એ નક્કી,
   એક જીવડું સાવજને ભરખી ગયું, સાવ અચાનક !

   શહેર આખ્ખુંય હવે સૂમ-સામ ભાસે છે;
   ઘર બહારથી કો'ક બંધ કરી ગયું, સાવ અચાનક !

   શંકાની નજરે જોતાં થઇ ગયાં એક-મેકને;
   માણસાઇની કતલ કોણ કરી ગયું, સાવ અચાનક !

                                     --હર્ષદ રાવલ

                                     વલ્લભવિદ્યાનગર,

👉 રચના નંબર - ૨

🌹શ્રાવણ માસ🌹

ઉચાટ વધી ગયો'તો
          અડધાં અષાઢે
                ચિંતીત જગતનો તાત રે....
વરસ્યો અનરાધાર
         ઉતરતાં અષાઢે
                જીવંત થઇ ગઇ આશ રે...
અમરત વરસસે
          જુઓ મન મૂકીને
                બેઠો શ્રાવણ માસ રે....
શિવજી આજે મારે
           આઁગણીયે આવે
                છોડી ધામ કૈલાસ રે....
પરથમ અભિષેક 
           કરીયો મેઘાએ
                સ્વાગત થયુ ખાસ રે...
 'ભરત' નું સમરણ થાશે
           આ માસમાં
                 આઝાદ દિનનો ઉલ્લાસ રે...
'સંભવામી યુગે યુગે' નો
           વાયદો સાચવવા
                  જનમશે જશોદાનો લાલ રે...
બેનડી બાંધશે 
            બાંધવને રાખડી
                  રક્ષા-કવચ ની એક આશ રે...
રામદેવના નોરતાં
           'ને વળી પયુૅષણ પણ
                   રૂડો ભાતીગળ શ્રાવણ માસ રે...
દેરાણી- જેઠાણીનો
            સુમેળ સધાશે
                    સાંભળીને શીતળામાની વાત રે...

મેળાની મૌસમ પણ
            આ માસમા જામશે
                    યૌવન વીંઝશે પાઁખ રે....
ઘરડાં સૌ વાત 
            એમના અનૂભવની કે'શે
                     બેસાડી બાળકોને આસપાસ રે..
ધ્યાનથી જોશો તો
            ધ્યાન પર આવશે
                     ગાંઠે બાધવા જેવી વાત રે...
ચોમાસે પિત્ત વધી
            ગયું હશે શરિરમાં
                    તહેવાર એ ખાન-પાનનું વિગ્નાન રે
      
                                 --હષૅદ રાવલ
                               વલ્લભવિદ્યાનગર